Saturday, December 12, 2009

كرجده توركجه كيلاسلاري تاريخينده ن

كرجده توركجه كيلاسلاري تاريخينده ن

http://www.rashedi-hasan.blogfa.com/post-35.aspx

دیلیمیزین ساده قیرامئری
( بو کیتاب تهراندا " اندیشه نو " انتشاراتی طرفیندن چاپ ائدیلمیشدیر )

گيريش
ايلک دفعه, ۱۳۷۶- جي ايل, ديليميزي سيستماتيک سويّه­ده کرج شهري­نين «گوهردشت» (رجايي شهر) آدلانان شهرجيگينده و بو شهرجيگين مسجدينه باغلي بير مکاندا تدريس ائتديم.

او ايل, ياي تعطيللري باشلانماقداايدي. فاصله­سي ائوميزدن چوْخ دا اوُزاق اوْلمايان محل مسجيديندن, گوٍن اوْرتايا ياخين اوُجا سس­ايله بير اعلان اوْخوندو:

«بسم­الله­الرّحمن­الرّحيم- , قابل توّجه اهالي محترم رجايي شهر, کوي کارمندان شمالي

در طول تعطيلات سه­ماهه تابستان, مسجد امام­جعفر صادق(ع) در نظر دارد دورة کلاسهاي زبان انگليسي, آلماني, عربي و آذري برگزار نمايد, از خانواده­هاي محترم دعوت مي­شود جهت ثبت­نام. . . .»

جومله­نين ايچينده گلن «آذري» سؤزونو ائشيتديکده قوُلاغيما اينانماديم !

بير داها اعلان تيکرار اوْلدوقدا, شوٍبهه­م آزالدي, لاکين يئنه اينانا بيلميرديم کي, کرج ده آذربايجان توٍرکجه­سينده کلاس قوْيولسون !

خبرين دوٍزگون اوْلدوغونو, مسجد کيتابخاناسيندان کيتاب آليب ائوه گتيرن قيٌزيم منه بيلديردي. او, حتي کلاسلاردا ايشتراک ائدن اؤيرنجيلرين شهريه­سي­نين مبلغيني­ده اؤيرنميشدي:

انگليس و آلمان ديلي ۱۰۰۰ توٍمن

عرب و آذري ديلي ۹۰۰ توٍمن

قيٌزيم, توٍرکجه کلاسين نه واخت, باشلاناجاغيني مسجيد مسئوللاريندان سوْروشدوقدا دئميشديلر:

«فعلاٌّ استادي براي زبان آذري نداريم اگر استاد پيدا نشود احتمالاٌّ دورة آذري را لغو مي­کنيم». بو سؤزلري ائشيدن قيٌزيم ائوه گليب جرياني منه سؤيله­ديکده تئز اؤزومو مسجيده يئتيرديم و توٍرکجه کلاسيندا درس وئرمه­يه حاضيرليغيمي بيلديرديم.

سؤزو چوْخ اوُزاتمادان, دئييم­کي, اينگيليس ديلي­ايله توٍرک ديلي کلاسلاري تشکيل تاپدي؛ لاکين آلمان ديلي­ايله عرب ديلينه آد يازديران آز اوْلدوقدان بو کلاسلار قوُرولمادي!

او ايل, من ديليميزي اوٍچ آي ياي تعطيللرينده تدريس ائتديم و بير دفعه ده حؤرمتلي عاليم «دوْقتور صديق»- ي قوْناق اوُستاد عوٍنوانيندا کلاسا دعوت ائتديم­کي, دوْقتور صديق حضرتلري­ده آلچاق کؤنوللوکله بو کلاسدا ايشتراک ائديب اؤيرنجيلري اؤز بيلگيلريله فايدالانديرديلار. بو کلاس نئجه­, کيمين توسّطي و يارديمي ايله تشکيل تاپميشدي بيلمه­ديم؛ يالنيز دئديلر: «مسجيدين امنا هيئتي طرفيندن بو کلاسين تشکيل تاپماسي پيشنهاد اوْلموشدو».

کلاسلار سوْنا چاتديقدان سوْنرا مسجيد طرفيندن بير تجليل مراسيمي اوٍزره, تَشَکّور عوٍنوانيندا, بير جيلد «مولوي» نين «شمس» ديواني منه هديه اوْلوندو.

او ايلدن سوْنرا, دانيشگاه اؤيرنجيلرينه ييٌغجام و نسبتاٌّ راحات بير قيٌرامئر درسليگي حاضيرلاماغي لازيم گؤردوم کي, الينيزده اوْلان کيتاب بو فيکير اساسيندا حاضيرلانميش و بير نئچه ايل تهران و کرج دانيشگاهلاريندا فوق برنامه کلاسلاريندا, توٍرک اؤيرنجيلرينه تدريس ائديلميشدير.

حسن راشدي ۱۳۸۳

0 Comments:

Post a Comment

<< Home