عاشیق حسن اسکندری‌نین عزیزلمه تؤره‌نینده

تهران، مثلی گؤرونمه‌ین مدنی ییغینجاق گؤردو!

http://azer-online.com/motafarrigha/ashigh_hasan/ashigh_hasan.htm

آذربایجان ائل عاشیغی، عاشیق حسن اسکندری‌نین 60 ایللیگی مناسبتیله تشکیل اولونان مجلسده، 2500 نفره یاخین آذربایجان مدنیتی وورغونلاری اشتراک ائتدیلر.

تهرانین جنوب حصه‌سینده یئرلشن بهمن مدنیت سارایینین 2000 نفرلیک شهید آوینی سالونوند، مرداد آیینین اون‌بیری ساعت 4 دن 9 قده‌ر، خالقیمیزین سئویملی اوغلو عاشیق‌حسنین شرفینه موسیقی و شعر آخشامی کئچیریلدی.

مراسم اجرا اولونان سالون بیر آز مدت مراسم باشلاناندان سونرا دولوب، نئچه یوز نفر ایاق اوسته و یا فرعی سالوندا قورولموش "مدار بسته" تلویزیونلاردا مراسیمی سئیر ائتدیلر. بئش ساعتلیک بو مراسیمده آذربایجان عاشیق، موغام و کلاسیک موسیقی‌لریندن نمونه‌لر اجرا اولوندو و عاشیق حسنین حیات و یارادیجیلیغی باره‌ده شعرلر و مقاله‌لر اوخوندو.

مراسمین مفصل گزارشی و اورادا اوخونان شعر و مقاله‌لر تدریجله آذربایجان سایتیندا وئریله‌جکدیر. هله‌لیک بو مراسیمین حاشیه خبرلرینی و مراسمدن بیر نئچه عکسی آذربایجان عزیز اوخوجولارینا تقدیم ائدیریک:

· مراسمی گؤرکملی آذربایجان شاعری و ساهر ادبی- مدنی درنه‌یینین اداره هیاتی عضوی حسن ایلدیریم و صابر ادبی انجمنی‌نین اداره هیئتی عضوی کریم قربانزاده جنابلاری اجرا ئتدیلر.

· قوروجو هیئتین وئردیگی برنامه اساسیندا، مراسیمی آذربایجانین تانینمیش عالمی رحیم رئیس‌نیا آچدی.

· بوتون موسیقی گروهلار اؤز اجرالارینی آذربایجانین ملی گئییمینده اجرا ائتدیلر.

· آذربایجان ایشیق گنجلری توسطیله عاشیق حسنین حیاتی باره‌ده دوزه‌لن 15 دقیقه‌لیک سندلی فیلم، اشتراکچیلارین بؤیوک رغبتینی قازاندی.

· تبریزده گلن 60 نفرلیک تبریز ملی اورکستری گروهو شهریار صدیقین رهبرلیگیله آذربایجان خالق ماهنیلارینی یئنی شیوه‌ و بؤیوک کر دسته‌سینین مشایعتیله اجرا ائتدیلر.

· مراسیمه ایرانین مختلف یئرلرینده، شخصیتلر و درنک‌لر طرفیندن پیاملار گؤرندریلمیشدیر.

· ‌مجلیسده گیلان، کرمان، تهران، خراسان و ایرانین بیر چوخ استانلاریندان مدنی درنک‌لر نماینده‌لری اشتراک ائتمیش، عاشیق حسنی تشکیل اولونان مناسبتله تبریک ائتدیلر.

· عاشیقین خارجده یاشایان دوستلاری و آذربایجان سایتی‌نین تحریریه هیاتینین مجلیسه گؤندردیگی پیام و تحفه‌سی، مجلسین سون حصه‌سینده رسمی اولاراق مراسیمین اجرا کمیته‌سی طرفیندن عاشیق حسنه وئریلدی

· ائلدار موسیقی گروهونون قادین عضولری، اذربایجانین ملی گئییمینده سئنه چیخدیقلاری اوچون اشتراکچیلارین بؤیوک رغبتینی قازانمیش، و تشویق ائدیجی اوزون ال چالمالارلا قارشیلاندیلار.

· مراسم مناسبتیله یاییلان مختلف بروشور و مطبوعات اؤزه‌ل نومره‌لری و عاشیقین خاطره کتابی اشتراکچیلارین بؤیوک سئوینجینه سبب اولموشدو.

· مراسیمین رسمی برنامه‌سینده اولان بیر ایکی نفرین مقاله‌لرینه اوخوماق اجازه‌سی وئریلمه‌میشدیر.

· آذربایجاندان گلن "رودکی موسیقی گروهو" ایرانی موسیقی ردیفلرینی مجلیسده اجرا ائتدیلر.

· اؤلکه‌نین مختلف مطبوعات و خبر آژانسلاری ایشچیلری مجلیسین گئدیشاتیندا خبر و شکیللر تهیه ائدیردیلر.

· آذربایجانین آق‌ساققال عاشیق و موسیقی خادملریندن سئن اوستونه دعوت ائتمکله و اونلارین آدلارینی چکمکله خصوصی قدردانلیق اولدو. او جمله‌دن: عاشیق رسول، عاشیق دهقان، عاشیق عین‌الله، اژدرعمی، عاشیق اشرف، علی فرشباق، حسن دمیرچی، تبریز موسیقی آموزشگاهلارینین رهبرلری و ....

· مراسیمین سون حصه‌سینده عاشیق حسنین اوغلو عاشیق نبی چیخیش ائتدیلر.

· مراسیمین زمانی 4 ساعت تعیین اولماغینا باخمایاراق، بیر ساعت اوزاندی و اشتراکچیلارین داغیلماسی گئجه ساعت 11دک چکدی.

· مجلیسین سونوندا عاشیق حسنه‌نین 40 ایل‌لیک فعالیتیندن تجلیل ائتمک اوچون اونا مختلف شخصیت‌لر، مطبوعات نماینده‌لری، عاشیقی سئونلر، انجمن و درنک‌لر طرفیندن تحفه‌لر وئریلدی.

· عاشیق حسن مراسیمده اؤز گؤزل دانیشیقیلا قوناقلاریندان تشکرلرینی بیلدیردی.

عاشیق حسنین 60ایللیکی مناسبتیله مجلیسی تبریز موسیقیچیلرینین صنفی انجمنی، ساهر ادبی- مدنی درنه‌یی، صابر ادبی انجمنی، آذری فصلنامه‌سی و آذربایجان ایشیق گنجلری طرفیندن قورولموشدور.