اينقيلاب ميتينگي نه­دن تهراندا قورولمادي

نئجه کي بيلير سينيز شنبه گونو خورداد آيي­نين 13-و تهراندا اولان ميلي چاليشقانلار بير ميتينگ کئچيرمک قرارينا گلميشديلر. آنجاق بو ميتينگ آشاغيدا يازديغيميز نه­دنلره گؤره قورولمادي.

تهراندا آلتي ميليوندان آرتيق تورک ياشايير، بو تورکلري اساسا ايکي يئره بؤلمک اولار

1- پوللو و تهرانين قوزئيينده ياشايان تورکلر کي چوخلوسو دوزدور آذربايجان هويتين ساخلاييبلار آنجاق يالنيز فرهنگي تؤرنلرده قاتيلارلار و بونلاري بير يئره توپلاماغا هئچ بير نهاد و سازمان يوخدور.

2- تهراندا ياشايان تورکلرين چوخو اونون گونئيينده ياشاييرلار. بو تورکلرين يوخاري فايزي کندلردن داشينميش و ايقيصادي لحاظدان دا جاميعه­نين آشاغي سطحينده اولانلاردان ساييليرلار. بونلارين بير يئره توپلانما يئري عزادارليق هئيتلرده اولور. اليميزه گلن آمارلارا گؤره تقريبا 517 تورک هئيتي واردير.

بو تورکلرله برابر تهراندا موقت شکلينده ياشايان تورک اؤيرنجيلر واردير. تهرانين آدليم 11 بيلي­يوردوندا 20 مين نفردن آرتيق تورک اؤيرنجي وار کي بونلارين ايچيندن لاپ آزي 1000 نفر چاليشقان دير. تورک چاليشقانلار ايللردير بيلي­يوردلاريندا تورکجه کيلاس، کولتورل تؤرن و اوردولار کئچيريبلر. بو چاليشمالار کي چوخلوسو بيلي يوردلاردا حصر اولوب. چوخ آشاغي سطح ده تهراندا ياشايان عادي جماعتي اؤزونه قاتا بيليب. دوزدور تهرانين گونئيينده يئرلشن بهمن کولتور ساراييندا 10 مين نفردن آرتيق تهران تورکلريندن قاتيلميشديلار. آنجاق بو يالنيز بير دفعه اولدو.

دوغروسو تهراندا تورکلرين ايچينده چاليشيقلار يالنيز اؤيرنجي سطحينده اولوبدور. البته دوغودا اولان ستارخان مدنيت اوجاغي بير ايستيثا دير .

بونلاري نظره آلاراق تبريز و تهرانين فرقي ده بيلينير. تبريز ده ميليت ايچينده بير چوخلو تشکوللر وار و اؤيرنجيلر اونلارلا برابر ايش بيرليک آپاريرلار. ولي تهراندا بو ايش اولماييب و بئله تشکوللر يوخدولار.

بو گون بيز ايکي يول سئچمه­لي­ييک يا گرک تهراني بوشلاياق يا دا تهران دا اولان تورک توپلوملاري تاني­ييب و اونلارلا ايش بيرليک آپاراق. مثلا هئيتلر الي ايله تورکجه کيلاس قوراق. کولتورل تؤرنلر کئچيردک و .....

آما گلک اينقيلاب ميتينگينه، يوخاريدا دئديگيميز نه­دنلره گؤره تبريزده ميلت قاباقدا دي و اؤيرنجيلر اونلارين داليسيندا گئدير آما تهراندا اؤيرنجيلر گرک ايشين باشلانماسينا قول قويسونلار. شنبه گونو مينلر نفر تهراندا ياشايان تورکلردن گلميشديلر و گؤزله­ييرديلر کي ميتينگ باشلاياندا اونلار قاتيلالار. آما ميتينگ باشلانمادي نييه کي ميتينگدن قاباق چاليشقانلارين چوخو تانينيب، بير پاراسي توتوقلانيب او بيريلري ايسه يوزلر قارا ياخا آختاريرديلار. بونا گؤره ده ميتينگين باشلانماسي بو چاليشقانلارين هامي­سي­نين توتولماسينا سبب اولاجاقدي و گله­جک چاليشمالارا سون قويا بيلردي. بو اساسدا ميتينگي قورانلار يئني ايستيراتژي اساسيندا بونا تاي خبر وئريلميش ميتينگلره سون قويوب، خبر وئريلمه­ميش و غافيلگير ائدن ميتينگلر قويماق قرارينا گلديلر. بو ميتينگ لغو اولوندو و اينشالله گله­جکده تهرانين هر يئرينده و اؤزلليکله محله­لرينده حاکيميتي غافيل ائدن ميتينگلره شاهيد اولاجاييق.